Ջրաբերդի ուղղությամբ սպանվել է 4 դիվերսանտ, ևս 3-ը սպանվել են Հադրութի ուղղությամբ: Այս մասին այսօր լրագրողների հետ հանդիպման ժամանակ ասաց «Ոսկանապատ» վերլուծական կենտրոնի տնօրեն, քաղաքագետ Լևոն Մելիք-Շահնազարյանը.
«Ադրբեջանական պնդումները, թե իրենք զոհ չեն ունեցել, ուղղակի սուտ են: Էլի եմ ասում՝ ունեն 7 զոհ: Վիրավորների թիվը 20-30 սահմաններում տատանվում է, դժվար է ասել։ Մեր կողմից միայն մեկ զոհ է եղել, բոլորս ցավում ենք կրտսեր սերժանտ Արմեն Հովհաննիսյանի համար, իսկ վիրավոր չունենք»,- ասաց քաղաքագետը:
Լևոն Մելիք-Շահնազարյանն ընդգծեց, որ արդրբեջանցի դիվերսանտներն ունեցել են քանակական զգալի առավելություն, բացի այդ՝ հատուկ նշանակության ջոկատայիններ էին.
«Մեր զինվորները ժամկետային զինծառայողներ էին: Ավելին՝ դիրքերից մեկում միայն 9 հոգով էին ու կարողացել են լիովին ջախջախել դիվերսանտների խումբը: Սա վկայում է նրանց հիանալի պատրաստվածության մասին»,- ասաց քաղաքագետը:
Լևոն Մելիք-Շահնազարյանը նշեց, որ երկու ադրբեջանցի դիվերսանտի դի մինչ այսօր չեզոք գոտում է.
«Նրանք վախում են գան տանեն: Մեզ էլ՝ հարյուր տարի պետք չեն»:
Միաժամանակ քաղաքագետն ընդգծեց՝ կան օրեր, որոնք Ադրբեջանն այդպես էլ չի կարողանում մարսել: Դրանցից մեկն է հունվարի 20-ը՝ Սև հունվարի օրը.
«Այդ օրերին պետք է հատկապես զգոն լինել»,- ասաց Լևոն Մելիք-Շահնազարյանը:
Աղբյուր` aysor.am
