Այս մասին NEWS.am-ի թղթակցի հետ զրույցում ասաց Արագածոտնի մարզի Ցամաքասար գյուղի գյուղապետ Գոռ Գրիգորյանը:

Իսկ հայրը Ռուսաստանից վերադառնալու ճանապարհին է տեղեկացել, թե իրականում ինչի համար են իրան շտապ կանչել Հայաստան ու նրա հեռախոսը միանգամից անհասանելի է դարձել: Վերջինս ավտոբուսով է վերադառնում: Զինծառայողի դին դեռ դիահերձարանում է: Համագյուղացիները ցանկացել են դիակը բերել Ցամաքասար, սակայն հայրը հանձնարարել է համբերել: Գյուղապետի խոսքով, մի խումբ համագյուղացիներ զննել են զինծառայողի դին եւ բռնության հետքեր չեն հայտնաբերել: «Մորն էլ չեն ասել: Տղան դեռ պետք է մնա դիահերձարանում, շուտ ասենէ, ժողովրդին տանջենք, իմաստը ո՞րն է»,- ավելացրեց գյուղապետը:

Ավելի վաղ տեղեկացրել էինք, որ Արման Հովսեփի Մուրադյանը 3 ամիս հետո պետք է տուն վերադառնար: Գյուղապետը պատմել էր, որ տղայի հայրը գյուղի իրենց տունն ու հողերը վաճառելուց հետո մեկնել էր Ռուսաստան՝ արտագնա աշխատանքի, իսկ մայրը կրտսեր որդու հետ ապրում է Էջմիածնում՝ հարազատների տանը: Հարցին, թե ճանաչելով Արմանին ի՞նչ է կարծում, նա ինքնասպանության կգնա՞ր, գյուղապետը պատասխանել էր. «Շատ խելոք ընտանիքի երեխա էր: Ինքը շատ խեղճ ծառայող էր, չէր հարմարվում: Մեր աչքի դեմը մեծացած երեխա էր, շատ խելոք, շնորհքով ընտանիք էր: Մի անգամ էլ դեպք եղավ, երբ ծառայությունից փախավ, էլի հետ տարանք: Ծառայության հետ չէր հարմարվում: Սերժանտ էլ է եղել, թե ինչի պետք է այդպիսի քայլի գնար, չեմ հասկանում»:

Հիշեցնենք, որ Արցախում հուլիսի 30-ին հյուսիս-արեւելյան ուղղությամբ տեղակայված զորամասերից մեկի պահպանության տեղամասի մարտական դիրքերից մեկում, նախնական տվյալներով, հրազենային մահացու վիրավորում է ստացել զինծառայող, 1993թ. ծնված Արման Հովսեփի Մուրադյանը: ԼՂՀ ՊՆ մամուլի ծառայությունից հայտնել էին, թե միջադեպի հետ կապված մանրամասները պարզելու համար տարվում է քննություն:
news.am