Արարատի մարզի Արբատ եւ Ազատաշեն գյուղերի ճանապարհին կից դաշտում 19-ամյա տղան դաժան ծեծի է ենթարկել 55-ամյա կնոջը, ուրագով հարվածներ է հասցրել գլխին, ապա փորձել շնչահեղձ անել: Կինը կորցրել է գիտակցությունը: Երիտասարդը, կարծելով, թե նա մահացել է, թողել հեռացել է: NEWS.am-ին հայտնի է դարձել, որ Հայկանուշ անունով կինն ու Թովմասը աշխատում են «Զվարթնոց» օդանավակայանի սրճարաններից մեկում: Կինը սպասք լվացող է, երիտասարդը` խոհարարի օգնական: Կինը տեւական ժամանակ պարտքով փող է տվել երիտասարդին եւ պարբերաբար պարտքը ետ է պահանջել: Երիտասարդն էլ հրաժարվել է վերադարձնել: Երբ հերթական անգամ Հայկանուշը իր գումարն է պահանջել, Թովմասը նրան հրավիրել է նշված վայր` գումարը վերադարձնելու: Սակայն դաժան ծեծի է ենթարկել նրան: Երբ կինը գլխին ուրագի հարվածներ ստանալուց հետո կորցրել է գիտակցությունը, երիտասարդը, կարծելով, թե նա մահացել է, դիմել է փախուստի: Կնոջը մարմնական ծանր վնասվածքներով տեղափոխել են «Երեւան» բժշկական կենտրոն:
Ոստիկանությունից դեպքի առնչությամբ NEWS.am-ի թղթակցի հետ զրույցում հաստատել են, որ նման ահազանգ ստացել են հունվարի 21-ին: Նախաքննությամբ պարզվել է, որ Թովմաս Վ.-ն ունի առողջական խնդիրներ եւ Մասիսի կենտրոնական հիվանդանոցի ուղեգրով տեղափոխվել է Նուբարաշենի հոգեբուժական հիվանդնաոց:
Դեպքի առթիվ ստիկանության Մասիսի քննչական բաժանմունքում քրգործ է հարուցվել ՀՀ Քրօրենսգրքի 34, 104 հոդվածի առաջին մասի հատկանիշներով, նախաքննությունը շարունակվում է:
