Նրա խոսքով՝ զույգերը հարսանիք չեն արել, այլ համեստ արարողակարգով Լուսինեին փեսացուն եւ հարազատները տարել են իրենց տուն` Ամասիա: Ավելի վաղ տեղեկացրել էինք, որ վթարի հետեւանքով փեսացուի եղբայրը` «ՎԱԶ 2109» մակնիշի ավտոմեքենայի վարորդը` 23-ամյա Արմեն Դարբինյանը, մահացել էր, իսկ «ՎԱԶ 21015»-ի ուղեւորը` հարսնացուն` 23-ամյա Լուսինե Ղամբարյանը, ծանր վիճակում տեղափոխվել էր հիվանդանոց: Վթարից տուժել է նաեւ հարսնացուի հորեղբայրը` 42-ամյա Հովհաննես Գեւորգյանը: Նորաշենի գյուղապետ Արթուր Կարապետյանը NEWS.am-ի թղթակցի հետ զրույցում ասել էր, որ ինքը եւս հրավիրված է եղել հարսանիքին: «Մեկ ամիս առաջ էր նշանդրեքը եւ այդ օրը պետք է ամուսնանային: Սակայն նախապատրաստական աշխատանքներով գյուղից դուրս են եկել, բախվել բարեկամի մեքենային եւ նման դժբախտ դեպք է տեղի ունեցել: Հարսին ցերեկը պետք է գային նվագով տանեին, հետո եկեղեցի եւ նոր հարսանյաց սրահ: Սակայն կատարվածից հետո էլ ի՞նչ հարսանիք: Փեսացուի կողմից մահ կա, իսկ հարսի կողմից 2 տուժող»,- պատմել էր գյուղապետը:
Սույն գործով մեղադրական եզրակացության մեջ նշվում է, որ 42-ամյա Հովիկ Գեւորգյանը հորեղբոր թոռան՝ Լուսինե Ղամբարյանի հարսանիքի կապակցությամբ, 2012թ-ի դեկտեմբերի 1-ին ժամը 08:00-ի սահմաններում իրեն փաստացի պատկանող «ՎԱԶ-2115» մակնիշի ավտոմեքենայով Նորաշեն գյուղից իրենց ազգականներին տեղափոխել է Արթիկ քաղաքի հարսանյաց սրահ: Ժամը 09:00-ի սահմաններում, Արթիկ-Ալագյազ ավտոճանապարհի 8-րդ կմ-ին, նա իր մեքենայով բախվել է «ՎԱԶ-2109» մակնիշի մեքենային, որում եղել են հարսնացու Լուսինե Ղամբարյանն ու նրա փեսացուի եղբայրը` Արմեն Դարբինյանը: Սարալանջ գյուղի վերջնամասից 1200 մ հեռավորությամբ դեպի Փոքր-Մանթաշ, ավտոճանապարհի 5 տոկոս վայրէջքային տեղամասով ընթանալիս Հովիկ Գեւորգյանը ավտոմեքենան դուրս է բերել հանդիպակաց երթեւեկելի ուղեմաս, դրա արդյունքում այդ ուղեմասում երկու ավտոմեքենաները առջեւի ձախ հատվածներով բախվել են, որի հետեւանքով «ՎԱԶ 2109»-ի վարորդ՝ Արմեն Դարբինյանը ստացած մարմնական վնասվածքներից տեղում մահացել է: Քրեական գործ է հարուցվել 242 հոդվածի 2-րդ մասով` ճանապարհային երթեւեկության կամ տրանսպորտային միջոցների շահագործման կանոնները խախտելը, որն անզգուշությամբ առաջացրել է մարդու մահ: Սույն հոդվածը պատժվում է ազատազրկմամբ` առավելագույնը 5 տարի ժամկետով:
news.am
