Հայերը չափազանց հարգալից են վերաբերվում միմյանց: Այս մասին «Euronews»-ի բլոգում գրել է Եվրոպական կամավորական ծառայության շրջանակում Սլովակիայից Հայաստան այցելած Յան Մրուգը, ով վերջերս իր երկրում հոգեբանության բակալավրի աստիճան է ստացել:
Իր հոդվածում նա երկրի եւ մարդկանց մասին տպավորություններն է ներկայացրել: Երեւանի մասին Յանը գրել է. «Ճարտարապետությունը տարբերվում է, մարդիկ այլ տեսք ունեն, բայց Երեւանը ժամանակակից քաղաք է, որտեղ ժամանակակից սովորույթներով մարդիկ են ապրում»:
Հայաստանում նրա համար ամենահետաքրքիր բացահայտումներից է եղել երթուղայինով երթեւեկությունը: «Ես լսել էի, թե ինչպես որոշ հայեր բողոքում են երթուղայինում իրենց հայրենակիցների պահվածքից, բայց այն, ինչ ես տեսա երթուղայիններում, հերքեց այդ ամենը»,- նշել է հյուրը:
Նա թվարկել է այն ամենը, ինչ զարմացրել է իրեն: «Երթուղայինում դուք միշտ վճարում եք ուղեւորության վերջում: Եվ ինձ մոտ ծագած առաջին միտքը հետեւյալն էր. իսկ ինչպե՞ս է պատահում, որ նրանք առանց վճարելու չեն փախչում: Երիտասարդները միշտ տեղը զիջում են տարեցներին: Եթե անկեղծ լինենք, Սլովակիայում նույնպես կարելի է տեսնել իրենց տեղը տարեցներին զիջող երիտասարդների, բայց հաճախ վերջինները վիրավորվում են, որ իրենց որպես ծերունի են ընկալում»,- գրել է Յան Մրուգը:
Նրան զարմացրել է նաեւ այն, որ պատահական մարդիկ երթուղայիններում գանձապահի են վերածվում: «Փորձեք Եվրոպայում պատահական մարդու 100 դրամ տալ, եւ փողը երբեք վարորդին չի հասնի: Բացի այդ, նստած ուղեւորները հաճախ պահում են իրենց բոլորովին անծանոթ կանգնած ուղեւորների պայուսակները, համակարգիչներն ու ձեռքին եղած այլ իրերը: Եթե պատկերացնում եմ, որ եթե իմ երկրում որեւէ մեկին առաջարկեմ բռնել նրա պայուսակը, ապա կմտածի, որ այդ մտադրություններ ունեմ…»,- ընդգծել է Յանը:
Հոդվածի հեղինակը հավելել է, որ իրեն տպավորել է հայ ժողովրդի հարգալից վերաբերմունքը: «Հասկանում եմ, որ այս փորձն այնքան էլ օբյեկտիվ միջոց չէ հայ հասարակությանը գնահատելու համար, սակայն ինձ մոտ տպավորություն ստեղծվեց, որ հայերը չափազանց հարգալից են վերաբերվում միմյանց: Նրանք նաեւ հպարտ են, վստահ, բարձր են խոսում… շատ բարձր, բայց միշտ հարգանքով»,- ամփոփել է Յան Մրուգը:
