Այսօր՝ հունվարի 18-ին, արտակարգ դեպք է տեղի ունեցել Երևանում: Ժամը 01:00—ից մինչև 01:30-ն ընկած ժամանակահատվածում հսկայական ապառաժ քարերի փլուզում է տեղի ունեցել Բաղրամյան 1-ին փակուղու թիվ 14 շենքի հարևանությամբ: Ինչպես նշված վայրից հայտնում է ֆոտոլրագրող Գագիկ Շամշյանը, բարեբախտաբար զոհեր և վիրավորներ չեն եղել, սակայն ընկած քարերը մեծ վտանգ են իրենցից ներկայացնում: Շենք մտնող ճանապարհն էլ ամբողջովին փակվել է: Նշված հատվածը հանրությանն ավելի շատ հայտնի է որպես «Նոտարի հայաթ»: Փլուզման հետևանքով վնասվել է նաև բնակիչներից մեկի ավտոտնակի պատը, իսկ մի քանի սեփական տներ էլ, կարելի է ասել, «կախված են մազից», ու եթե պատկան մարմինները կարճ ժամանակում թափված քարերը չհեռացնեն և բետոնե պատնեշ չկառուցեն, չի բացառվում, որ եղանակային այս պայմաններում մի քանի տներ կփլուզվեն: Դեպքի վայր միայն ժամանել են ՀՀ Տարածքային կառավարման և արտակարգ իրավիճակների նախարարության փրկարար ծառայության և «Գազպրոմ» ընկերության ներկայացուցիչները, սակայն Կենտրոն վարչական շրջանի պատասխանատուներից մինչև այս պահը չեն բարեհաճել այցելել, հավանաբար, Կենտրոնի չինովնիկները գտնվում են «ամանորյա ղումարի տակ»:

shamshyan.com