մանրամասներ են հայտնի դարձել ամերիկյան հեռուստաաստղ Քիմ Քարդաշյանի՝ Հայաստան այցելության մասին: Մեր տեղեկություններով՝ հայտնի հեռուստաստղը Հայաստան է ժամանելու առաջիկա շաբաթվա ընթացքում, նա Հայաստանում կմնա մոտ մեկ շաբաթ։ Նախ Հայաստան կժամանեն նրա անձնակազմի անդամները՝ մի քանի տասնյակ անձիք, որոնք հայտնի քույրերի այցի հետ կապված նախապատրաստական աշխատանքներ կտանեն։
Մեր տեղեկություններով՝ Քիմ Քարդաշյանը եւ նրա անձնակազմը մնալու են Երեւանի բարձրակարգ հյուրանոցներից մեկում, որտեղ արդեն ամրագրել են երկու հարկաբաժնի բոլոր համարները։
Հիշեցնենք, որ ավելի վաղ NEWS.am STYLE-ի հետ զրույցում Հայաստանի ազգային արխիվի տնօրեն Ամատունի Վիրաբյանը նշել էր, որ Քիմ Քարդաշյանի ներկայացուցիչները այցելել են իրեն, հետաքրքրվել Քարդաշյանի նախնիների վերաբերյալ արխիվում փաստաթղթերի առկայության մասին եւ պայմանավորվել, որ ազգային արխիվ կայցելեն եւս մեկ անգամ՝ նկարահանումներ իրականացնելու նպատակով։ Նշենք, որ Քիմ Քարդաշյանի՝ Հայաստան այցի ընթացքում նախատեսվում է նկարահանումներ անել Keeping up with Kardashians ռեալիթի-շոուի համար։ Նկարահանումների մի մասը կիրականացվի Գյումրիում, որտեղ, ըստ Ամատունի Վիրաբյանի, Քարդաշյանները հեռավոր ազգականներ ունեն։
Հիշեցնենք, որ վերջերս Daily Mail կայքը տեղեկություններ էր հրապարակել Քարդաշյանների նախնիների մասին, որտեղ նշվում էր, որ նրանք բնակվել են Կարսի շրջանում։ Քիմ Քարդաշյանի պապն Ամերիկա է տեղափոխվել մինչեւ Ցեղասպանությունը, սակայն Քարդաշյան ընտանիքի մյուս անդամները, ովքեր մնացել են եւ փրկվել սպանդից, ապաստանել են Գյումրիում, որն այն ժամանակ Ալեքսանդրապոլ էր կոչվում:
