«Գարնան սկիզբը բնության մեջ էներգետիկ փոփոխությունների ժամանակահատված է: Մարդը բնության մասնիկն է և որպես միկրոկոսմոս ենթարկվում է տիեզերքում ու բնության մեջ տեղի ունեցող փոփոխություններին,- երեկ «Իրատես de facto» ակումբում, խոսելով մարդու օրգանիզմի վրա գարնան ազդեցության մասին, ասաց մանուալիստ, ֆիզիոթերապևտ, ակադեմիկոս ԳԱԳԻԿ ԿԱՐԱՊԵՏՅԱՆԸ, նշելով, որ հիվանդներն իրեն դիմում են հատկապես գարնանը և աշնանը:- Ժողովուրդը պատահաբար չի ասում մահամերձ հիվանդների մասին. «Եթե գարունը հանի, կապրի»: Այսինքն՝ գարնանը օրգանիզմը պայքարում է և հիվանդությունների դեմ, և էներգետիկ ճգնաժամի կարգավորման համար»:
Հոգեբան ԼԻԼԻԹ ԽԱՉԱՏՐՅԱՆԸ հավելեց, որ գարունը բազմաձև ազդեցություն ունի մարդու օրգանիզմի վրա. ակտիվանում են մարդու կենսակերպը, վարքային դրսևորումները, տեղի են ունենում հորմոնալ փոփոխություններ, օրգանիզմում պակասում է վիտամինների և հանքային նյութերի քանակությունը, ինչն իր հերթին կարող է ավելորդ նյարդային գրգռվածության պատճառ դառնալ: Հոգեբանը նկատեց նաև, որ երբ դրսում զարթոնք է, բնական փոփոխություններ են տեղի ունենում, իսկ մարդը չի կարողանում իրականացնել իր որևէ պահանջմունքը, սպասելիքները (իսկ գարնանը դրանք ակտիվանում են), կարող է հայտնվել հոգեբանական ծանր վիճակում. «Դեպրեսիվ վիճակներ են առաջանում հիմնականում այն մարդկանց մոտ, ովքեր վարքային «ռեպերտուարի» առումով ավելի պասիվ են և հակված են շրջապատից ինչ-որ բան ստանալու: Սակայն պետք է տարբերել դեպրեսիան և տխուր-տրտում տրամադրությունը: Մեր բնակիչները ցանկացած տրամադրության անկում դեպրեսիա են անվանում: Մինդեռ դեպրեսիան ունի հստակ ախտանիշներ. մարդը կարծես ներքին տառապանք է զգում, ապագայի նկատմամբ վախ, անորոշություն, հուսալքություն, կտրվում է իրականությունից, դառնում անզոր, վրա են հասնում քնկոտությունը կամ անքնությունը»: Հոգեկան հիվանդությունները նույնպես գարնանը գլուխ են բարձրացնում, ինչը, հոգեբանի խոսքով, պայմանավորված է նրանով, որ մարդու հոգեկան տառապանքի և բնության զարթոնքի միջև հակադրություն է առաջանում:
Հարց է առաջանում՝ ինչպե՞ս դիմավորել գարունը` խուսափելով առողջության հետ կապված բարդություններից:
Լիլիթ Խաչատրյանը խորհուրդ տվեց ապրել ակտիվ կյանքով, հաճախել ֆիտնես ակումբներ, շրջապատված լինել դրական մարդկանցով, գիտակցել, որ ցանկացած իրավիճակ ունի լուծում, տրտմելու փոխարեն պետք է ելք որոնել: Խորհուրդ է տրվում նաև ինքնաթերապիայով զբաղվել՝ նկարելու, հույզերը որոշակի ձևերով արտահայտելու միջոցով:
«Գարնանային դեպրեսիաները համատարած բնույթ չեն կրում,- նկատեց հոգեբանը:- Ավելին, առողջ, ակտիվ ապրելակերպը կարելի է համատեղել բնության զարթոնքի հետ, հասնել ներդաշնակության, ունենալ նոր սպասումներ, նոր ծրագրեր, հասնել լավագույն արդյունքների»:
Գագիկ Կարապետյանի խոսքով՝ գարնանը պետք է մաքրել, բեռնաթափել օրգանիզմը` նախընտրությունը տալով բուսական, նաև վիտամիններով հարուստ սննդին: Պետք է ճիշտ արտահայտել էմոցիաները, կատարել ֆիզիկական, շնչառական վարժություններ: «Մարդը պետք և ֆիզիկապես, և հոգեբանորեն պատրաստ լինի գարնան, աշնան անցումներին,- ընդգծեց նա, իր փորձից ելնելով փաստեց, որ ողնաշարային խնդիրներն ուղեկցվում են դեպրեսիոն դասի որևէ հիվանդությամբ:- Այսինքն, համակարգված աշխատանք պետք է արվի: Գերմանիայում, օրինակ, հոգեբանը, նյարդաբանը, ֆիզիոթերապևտը, սրտաբանը աշխատում են համախմբված՝ հաշվի առնելով հիվանդի խնդիրը»:
Մեր մյուս բանախոսի կարծիքով՝ կարևոր է, որ մարդն ինքը դառնա ակտիվ սուբյեկտ, պայքարի իր անձի, իր առողջության համար. «Երբ մոտիվացիան բարձրանում է, շատ խնդիրներ լուծվում են: Հոգեբանությամբ մարդը կարող է կառավարել և ֆիզիկական, և հոգեկան մակարդակի բավարարվածության սահմանները»:
«Մարդը չի կարող ֆիզիկապես թույլ ու անառողջ լինել, 500 մետր չքայլել, բայց փայլել հոգեբանությամբ: Երբ հիվանդը բուժվում է, փոխվում է նաև նրա հոգեբանությունը»,- հակադարձեց ֆիզիոթերապևտը:
Ի պատասխան՝ հոգեբանը նկատեց, որ առողջ մարդն էլ իր ներաշխարհով պայմանավորված կարող է հիվանդի կերպարի մեջ մտնել, ուռճացնել իր փոքր հիվանդությունը շրջապատի աչքում:
Չնայած տարակարծությանը, շեշտադրումը մեկն էր՝ հարկ է պաշտպանել օրգանիզմը գարնան ազդեցությունից և ապրել առողջ:
irates.am
