Այսօր՝ փետրվարի 5-ին, խոշոր ու շղթայական ավտովթար է տեղի ունեցել Երևանում: Ժամը 08:00-ի սահմաններում Աթենքի փողոցում ճանապարհի մերկասառույցի պատճառով բախվել են «Բոգդան» մակնիշի 4004 Տ, «Volkswagen Golf» մակնիշի 29 ՕԼ 553 համարանիշի, «Toyota» մակնիշի 35 ՕP 634 համարանիշի և «Volkswagen Passat» մակնիշի 05 ՕՍ 444 համարանիշի ավտոմեքենաները: Ինչպես վթարի վայրից հայտնում է ֆոտոլրագրող Գագիկ Շամշյանը, ըստ նախ տեղեկությունների՝ վթարի հետևանքով, բարեբախտաբար, զոհեր ու վիրավորներ չկան: Ֆոտոլրագրողը հայտնում է, որ վթարի պատճառը ճանապարհի մերկասառույցն է եղել, ու եթե պատկան մարմինները ժամանակին կատարեին ճանապարհի մշակման՝ աղ ու ավազի լցման աշխատանքներ, ապա վթարը տեղի չէր ունենա: Այս պահին նշված վայր են ժամանել Ճանապարհային ոստիկանության 1-ին սպայական գումարտակի 6-րդ դասակի աշխատակիցներն ու ապահովագրական ընկերությունների ներկայացուցիչները: Վարորդներն արդարացիորեն բարձրաձայնում են, որ չգիտեն, թե ով է փոխհատուցելու վնասը, երբ հստակ է, որ պատճառը մերկասառույցն է: Ֆոտոլրագրողը հայտնում է նաև, որ «Բոգդանը» սպասարկում է թիվ 63 երթուղին: Տեղում քննչական աշխատանքները ղեկավարում է ՃՈ հետաքննչական բաժնի ավագ հետաքննիչ Գրիգոր Ավետիսյանը:

shamshyan.com