Յոնջլախի դպրոցում իրար են «մորթել»

Երեւանի թիվ 65 ավագ դպրոցի 12-րդ դասարանն ավարտող Արմանն իր դասարանի հետ Վերջին զանգի տոնական միջոցառումներին չմասնակցեց, նա դատարանում էր՝ ամբաստանյալի աթոռին:

Ըստ մեղադրանքի՝ Արմանը 2013 թվականի դեկտեմբերի 5-ին, ժամը 12-ն անց 40 րոպեին իրենց դպրոցում աղջկա հարցով պարզաբանում ստանալու համար դասարանից դուրս է կանչել 11-րդ դասարանցի Միքայելին:

Վերջինիս հետ անմիջապես դասարանից դուրս են եկել նաեւ նրա մի քանի դասընկերները, այդ թվում՝ ներկա գործով տուժողներ Ռոլանդն ու Էրիկը:

Արմանի ու Միքայելի միջեւ վիճաբանություն է ծագել հենց դպրոցական միջանցքում:

Արմանը ձեռքով հարվածել է Միքայելին:

Ապա խառնվել են վերջինիս դասընկերները, եւ տուժել են հենց նրանք՝ Ռոլանդն ու Էրիկը:

Արմանը, ըստ մեղադրանքի՝ երկու անձի մարմնական վնասվածք պատճառելու դիտավորությամբ սուր կտրող-ծակող գործիքով հարվածել է Ռոլանդի գոտկային շրջանին, ինչպես նաեւ Էրիկին՝ երկուսի առողջությանն էլ պատճառելով միջին ծանրության վնաս՝ առողջության տեւական քայքայումով: Տուժողներն ապաքինվել են:

Արման Մ.-ին մեղադրանք է առաջադրվել ՀՀ քրեական օրենսգրքի 113 հոդվածի 2-րդ մասի 1-ին կետով:

Ընդհանուր իրավասության դատարանում Արման Մ.-ն իրեն լիովին մեղավոր է ճանաչել, զղջացել կատարածի համար:

Մեղսագրված արարքի համար օրենքով նախատեսվում է առավելագույնը՝ 5 տարի ազատազրկում:

Արմանի ասելով՝ հանցագործության գործիք դանակն իր մոտ չի եղել, ինքն այն նկատել ու վերցրել է… դպրոցական միջանցքի հատակից:

Ամբաստանյալը կալանքի տակ չէ: Նա հանձնվել է ծնողների հսկողությանը:

Շարունակությունը թեթրի այսօրվա համարում:

Աղբյուր՝ hayeli.am